Reha reha ke bohut yaad woh aaye tam'aam shab...

Reha reha ke bohut yaad woh aaye tam'aam shab,
mar mar ke maine lamhe bitaaye tam'aam shab...

kam ho saka na dard-e-juda'ii ka aNdhera
maine, charaaGh-e-ashk jalaaye tam'aam shab...

aisii bhi ko'ii raat muqaddar meiN kaash ho
hum rooTh jaayeN ko'ii manaaye tam'aam shab...

raatoN ko jaagne ka mujhe shauq to nahiiN !!
kambakht dil ka zaKhm sataaye tam'aam shab...

zaalim hai teri tarha'he, terii yaad bhi jaana,
ashkoN ka zehar mujhko pilaaye tam'aam shab...

woh khwaab ki duniya meiN tha...baiThi thi maiN yahaaN,
palkoN ko raaste pe bichhaye tam'aam shab...

kaise maiN maan luuN ke buri hai sharaab, yeh
marham mere zaKhmoN pe lagaaye tam'aam shab...

"maikash" nahi hui hai  "yooN hi" yeh Shayari!
kaaGhaz pe baDe ashk bahaaye tam'aam shab... <<–<<–<<♥Shabnam♥>>–>>–>>