Uski aankhon main mohabbat ka sitara hoga

Uski Aankhon Main Mohabbat Ka Sitara Hoga,
Ek Din Ayega Woh Shakhs Humara Hoga...

Tum Jahan Mere Liye Sipiyan Chunte Hoge
Woh Kisi Aur Hi Duniya Ka Kinara Hoga...

Zindagi.. Ab Ke Mera Naam Na Shamil Karna,
Gar Yeh Tay Hai Ke Yehi Khail Dobara Hoga...

Jis Ke Hone Se Meri Saans Chala Karti Thi
Kis Tarha UsKe Bagair Guzara Hoga...

Yeh Achanak Jo Ujaala Sa Hua Jata Hai,
Dil Ne Chupke Se Tera Naam Pukaara Hoga...

Ishq Karna Hai Tho Din Raat Usse Sochna Hai,
Aur Kuch Zehen Main Aaya Tho Khasara Hoga...

Yeh Jo Pani Main Chala Aya Sunehri Sa Gharoor,
UsNe Dariya Main Kahin Paun Utara Hoga...
Kaun Rota Hai Yahan Raat Ke Sannaton Me,
Mere Jesa Hi Koi Hijar Ka Mara Hoga...

Mujh Ko Maloom Hai Jaise hi Main Qadam Rakhungi,
Zindagi Tera Koi Aur Kinara Hoga...

Jo Meri Rooh Main Baadal Se Garajte Hain SHABNAM
Usne Seene Main Koi Dard Utara Hoga...

Kaam Mushkil Hai Magar Jeet Hi Lungi UsKo,
Mere Mola Ka SHABNAM yunhi Ishara Hoga... <<–<<–<<♥>>–>>–>>